கெபுன் பூங்கா – வருகின்ற பிப்ரவரி 1-ஆம் தேதி நடைபெறும் தைப்பூசம் திருவிழாவை முன்னிட்டு, தண்ணீர்மலை ஸ்ரீ பாலதண்டாயுதபாணி ஆலயத்திற்குச் செல்லும் முதியோர்கள் மற்றும் மாற்றுத்திறனாளிகளுக்காக சிறப்பு போக்குவரத்து சேவை ஏற்பாடு செய்யப்பட்டுள்ளன. இது அவர்களின் பாதுகாப்பு மற்றும் நலனை உறுதி செய்வதற்கான முயற்சியாகும்.
பினாங்கு தண்ணீர்மலை ஸ்ரீ பாலதண்டாயுதபாணி தேவஸ்தான நிர்வாகம் மற்றும் பினாங்கு இந்து அறப்பணி வாரியம் (PHEB) இந்த முன்முயற்சியை ஏற்பாடு செய்துள்ளது.
வயதான பக்தர்கள் மற்றும் மாற்றுத்திறனாளிகள் பிரார்த்தனை செய்யவும், வேண்டுதலை பாதுகாப்பாக நிறைவேற்றவும் இந்த முயற்சி அறிமுகப்படுத்தப்பட்டுள்ளதாக PHEB துணைத் தலைவர் செனட்டர் டாக்டர் லிங்கேஸ்வரன் தெரிவித்தார்.
“மலையேற்றப் பயணத்தில் உடல் ரீதியான சவால்களை எதிர்கொள்ளக்கூடிய பக்தர்களின் பாதுகாப்பை உறுதி செய்வதற்காகவும் இத்திட்டம் செயல்படுத்தப்பட்டது. இது புனித ஆலயத்தில் பிரார்த்தனை செய்ய வேண்டும் என்ற அவர்களின் நீண்டகால விருப்பத்தை நிறைவேற்ற அனுமதிக்கிறது.
“இந்த திட்டத்தின் மூலம் 60-க்கும் மேற்பட்ட முதியவர்கள் மற்றும் மாற்றுத்திறனாளி பக்தர்கள் மலை உச்சியில் அமைந்திருக்கும் முருகப்பெருமானின் ஆசீர்வாதம் பெற்றனர்.
“அவர்களின் நல்வாழ்வுக்காக சிறப்பு பூஜை மற்றும் அபிஷேகம் நடைபெற்றது. இது பக்தர்களுக்கு ஆழ்ந்த ஆன்மீக அனுபவத்தை வழங்கி, அவர்களும் அவர்களது குடும்பங்களும் மகிழ்ச்சியும் மனஅமைதியும் அடைய வழிவகுத்தது,” என்றார்.
ஆலய நிர்வாகக் குழுவினர், பணிக்குழுவினர் மற்றும் 40 தன்னார்வலர்களின் தன்னலமற்ற சேவையால் இந்த திட்டம் வெற்றிகரமாக செயல்படுத்தப்பட்டது. அவர்கள் ஒவ்வொரு இப்பயணம் சீராகவும், பாதுகாப்பாகவும் மற்றும் கருணையுடன் நடத்தப்படுவதை உறுதி செய்தனர்.
மலை உச்சியில் அருள்பாலிக்கும் பாலதண்டாயுதபாணியைக் காண விரும்பும் முதியோர்கள் மற்றும் மாற்றுத்திறனாளி பக்தர்களுக்கு உதவ, பினாங்கு இந்து அறப்பணி வாரியம் முழுமையாக உறுதிபூண்டுள்ளதாக துணைத் தலைவர் டாக்டர் லிங்கேஸ்வரன் தெரிவித்தார். வாரியம் அல்லது ஆலய நிர்வாகத்துடன் முன்னதாக தொடர்பு கொண்டால், முதியோர்கள் மற்றும் மாற்றுத்திறனாளிகளுக்கு எந்த நேரத்திலும் போக்குவரத்து மற்றும் தேவையான ஆதரவை வழங்க தயாராக உள்ளதாகவும் அவர் தெரிவித்தார்.
இந்த முயற்சி ஒரு முறை செய்யப்படும் முன்முயற்சி திட்டம் அல்ல; மாறாக, கடந்த ஆண்டு அறப்பணி வாரியத் தலைவரும் ஜெலுத்தோங் நாடாளுமன்ற உறுப்பினருமான ஆர்.எஸ்.என். இராயர் அறிவித்ததையடுத்து, இத்திட்டம் வருடாந்திர திட்டமாக ஏற்றுக்கொண்டு நடைமுறையில் கொண்டு வரப்படுவதாகவும் அவர் தெரிவித்தார்.
இந்த தொடர்ச்சியான அர்ப்பணிப்பு, உள்ளடக்கம் மற்றும் அணுகலின் வழியாக, எந்த ஒரு பக்தரும் தங்கள் ஆன்மீக வழிபாட்டினை நிறைவேற்றுவதில் பின்தங்குவதில்லை என்பதை உறுதி செய்வதே வாரியத்தின் முக்கிய நோக்கமாகும். இது, குறிப்பாக தைப்பூசம் போன்ற முக்கியமான மத நிகழ்வுகளின் போது வலியுறுத்தப்படுகிறது.