ஜார்ச்டவுன் – பினாங்கு மாநிலத்தில் புதிய தமிழ் இடைநிலைப்பள்ளி அமைப்பதற்கான பரிந்துரை மீண்டும் முன்வைக்கப்பட்டுள்ளது.
பினாங்கு அதிக எண்ணிக்கையிலான தமிழ் தொடக்கப் பள்ளிகளைக் கொண்ட மாநிலங்களில் ஒன்றாகும். இம்மாநிலத்தில் 28-க்கும் மேற்பட்ட தமிழ்ப்பள்ளிகளைக் கொண்டுள்ளது.
“ஒவ்வொரு ஆண்டும், ஆறாம் ஆண்டு முடிக்கும் ஆயிரக்கணக்கான தமிழ் மாணவர்கள், கற்பித்தல் மொழியில் திடீர் மாற்றத்தை எதிர்கொண்டு, பிரதான உயர்நிலைப் பள்ளிகளுக்குச் செல்ல வேண்டியுள்ளது.
இந்த இடைவெளி கல்வி செயல்திறன், மலாய், அறிவியல் மற்றும் கணிதம் ஆகிய பாடங்களில் தேர்ச்சி பெறுவதைப் பாதிக்கிறது. மேலும், பள்ளிப் படிப்பை இடைநிறுத்துவதற்கான அபாயத்தை குறிப்பாக B40 குடும்பங்களில் அதிகரிக்கிறது.
“எனவே, ஒரு தமிழ் இடைநிலைப்பள்ளி நிறுவுதல் இனி ஒரு ஆசை மட்டுமல்ல, தமிழ் மாணவர்களுக்கு இடைநிலைக் கல்விக்கான சமமான அணுகலை உறுதி செய்வதற்கான அவசரத் தேவையாகும்,” என பாகான் டாலாம் சட்டமன்ற உறுப்பினர் குமரன் கிருஷ்ணன் தனது தொகுப்புரையில் இதனைப் பரிந்துரைத்தார்.
தமிழ் இடைநிலைப் பள்ளியை (SMT) நிறுவுவதற்கு ஏற்ற மாநிலமாக பினாங்கு திகழ்தற்கான காரணங்களை குமரன் பகிர்ந்து கொண்டார்.
அ) நிலையான மற்றும் குறிப்பிடத்தக்க தமிழ் மாணவர்கள் எண்ணிக்கை,
b) STEM, TVET மற்றும் எதிர்கால தொழில்நுட்பங்கள் உட்பட ஒரு முற்போக்கான மாநில கல்வி சுற்றுச்சூழல் அமைப்பு.
c) தாய்மொழிக் கல்விக்கு மாநில அரசின் நிலையான அர்ப்பணிப்பு.
d) தமிழ்க் கல்வி வளர்ச்சியை தீவிரமாகக் கண்காணிக்கும் தற்போதைய பினாங்கு தமிழ்ப்பள்ளிகளுக்கான சிறப்புக் குழுவின் ஆதரவு.
“மலேசியாவில் முதல் தமிழ் இடைநிலைப் பள்ளியை நிறுவுவதற்கான கொள்கையை அங்கீகரிப்பதற்காக மாநில அரசு மலேசிய கல்வி அமைச்சிடம் (MOE) அதிகாரப்பூர்வ விண்ணப்பத்தைக் கொண்டு வர வேண்டும்”, என குமரன் கோரிக்கையை முன் வைத்துள்ளார்.
இந்த தமிழ் இடைநிலைப் பள்ளியின் நிறுவுதல், அனைத்து மலேசிய மாணவர்களுக்கும் கல்வி, சமூக நீதி மற்றும் சம வாய்ப்புகள் ஆகியவற்றை வலியுறுத்தும் மடானி அரசாங்கத்தின் தொலைநோக்குப் பார்வைக்கு முழுமையாக இணங்குகிறது.
பாகான் டாலாமில் ஏற்கனவே இப்பள்ளியை நிறுவ நிலம் அடையாளம் காணப்பட்டுள்ள வேளையில் இத்திட்டம் நனவாக்கப்பட்டால் பினாங்கு மாநிலத்திற்குப் பயனளிப்பதோடு, மலேசியாவில் தாய்மொழிக் கல்விக்கான புதிய அத்தியாயத்தைத் திறக்கும் என குமரன் நம்பிக்கை தெரிவித்தார்.
ஆகவே, இந்தத் தமிழ் இடைநிலைப்பள்ளியில் மாணவர்களின் தேவைகள், பாடத்திட்டம், TVET மற்றும் STEM கல்வியின் அவசியம் ஆகியவற்றை உள்ளடக்கிய ஒரு சாத்தியக்கூறு ஆய்வை மேற்கொள்ள பினாங்கு கல்வி இலாகா, செபராங் பிறை மாநகர் கழகம் மற்றும் பினாங்கு தமிழ்ப்பள்ளிகளுக்கான சிறப்புக் குழு ஆகியவை ஒன்றிணைந்து செயலாற்ற குமரன் வலியுறுத்தினார்.
“பினாங்கு வரலாறு படைக்கும் திறன் கொண்டது. மலேசியாவின் முதல் தமிழ் இடைநிலைப் பள்ளியை நிறுவும் முன்னோடியான இடமாக பாகன் டாலாம் செயல்படத் தயாராக உள்ளது,” என அவர் மேலும் தெரிவித்தார்.