ஜாவி – தாமான் பெலாடுக், லோரோங் பெலாடுக் 3-இல் அமைந்துள்ள 3.607 ஏக்கர் பரப்பளவிலான திறந்தவெளிப் பகுதி, இளைஞர்களுக்கான ‘ஸ்கேட் பார்க்’ உள்ளிட்ட பல்வேறு வசதிகளுடன் கூடிய, உயர்தரமான, பாதுகாப்பான மற்றும் அனைவரையும் உள்ளடக்கிய நவீன ‘தாமான் மடானி’ சமூகப் பூங்காவாக தரம் உயர்த்தப்படவுள்ளது.
“இத்திட்டம் அப்பகுதியில் உள்ள பொழுதுபோக்கு வசதிகளின் தரத்தை மேம்படுத்துவதுடன், உள்ளூர் மக்களுக்கு வசதியான மற்றும் பயனுள்ள ஓய்வு மற்றும் பொழுதுபோக்கு இடத்தை வழங்குவதை நோக்கமாகக் கொண்டுள்ளது,” என்று ஊராட்சி, நகர் மற்றும் புறநகர் திட்டமிடல் ஆட்சிக்குழு உறுப்பினர் ஜேசன் ஹெங் மூய் லாய் தெரிவித்தார்.
அவரது கூற்றுப்படி, லாட் 1685 மற்றும் லாட் 2178 ஆகியவை திறந்தவெளிப் பகுதிகளாக அரசிதழில் பதிவு செய்யப்பட்டுள்ளன. இத்திட்டத்தைச் செயல்படுத்தி, மேற்பார்வையிடும் பொறுப்பு செபராங் பிறை மாநகர் கழகம் (எம்.பி.எஸ்.பி) வசம் உள்ளது.
“இந்தப் பகுதியில் ஏற்கெனவே ஒருங்கிணைந்த மற்றும் தனிநபர் விளையாட்டு உபகரணங்கள், உடற்பயிற்சி வசதிகள், நடைபாதைகள், ஓய்விடங்கள் மற்றும் பல்வேறு பொழுதுபோக்கு நடவடிக்கைகளுக்கான வசதிகள் உள்ளன. மேலும், காலை நேர உடற்பயிற்சி மற்றும் பல்வேறு பொழுதுபோக்கு நடவடிக்கைகளுக்காகப் பயன்படுத்தக்கூடிய திறந்தவெளித் திடலும் அமைந்துள்ளது,” என்றார்.
“சமூகத்தின் அனைத்துத் தரப்பினரும் இவ்வசதிகளைப் பயன்படுத்துவதை உறுதிசெய்யும் வகையில், மாற்றுத்திறனாளிகளுக்கான சிறப்பு வசதிகளும் இங்கு ஏற்படுத்தப்பட்டுள்ளன,” என்றும் அவர் தெரிவித்தார்.
தாமான் பெலாடுக், லோரோங் பெலாடுக் 3 திறந்தவெளிப் பகுதியில் மேற்கொள்ளப்பட்டு வரும் நிலவடிவமைப்பு மேம்பாட்டுப் பணிகள் மற்றும் அதனுடன் தொடர்புடைய மேம்பாடுகள் தொடர்பாக நடைபெற்ற செய்தியாளர் சந்திப்பில் ஜேசன் இவ்வாறு தெரிவித்தார்.
இந்நிகழ்வில், எம்.பி.எஸ்.பி உறுப்பினர்களான ஹெங் யே ஷியுவான் மற்றும் ஙோ செங் ஹாய், எம்.பி.எஸ்.பி நிலவடிவமைப்புத் துறை இயக்குநர் ஷக்ரோனி முகமது யூசோஃப் @ ஜமாலுதீன், அத்துறையின் மூத்த உதவி இயக்குநர் சித்தி பாத்திமா இஸ்மாயில் ஆகியோரும் கலந்து கொண்டனர்.
உள்ளூர் மக்களின் கோரிக்கையை ஏற்று, ஒன்று அல்லது இரண்டு ஆண்டுகளுக்கு முன்னர் அமைக்கப்பட்ட இந்தப் பொழுதுபோக்கு மையம், தற்போது தாமான் பெலாடுக் மற்றும் அதனைச் சுற்றியுள்ள பகுதிகளைச் சேர்ந்த மக்களால், குறிப்பாக காலை மற்றும் மாலை வேளைகளில், அதிகளவில் பயன்படுத்தப்பட்டு வருவதாக ஜேசன் மேலும் தெரிவித்தார்.
“இந்த மேம்பாட்டுத் திட்டத்தின் மூலம் உள்ளூர் சமூகத்திற்குத் தேவையான கூடுதல் வசதிகளை ஏற்படுத்த இலக்கு கொண்டுள்ளோம். குறிப்பாக, இளைஞர்களுடனான கலந்துரையாடல் அமர்வுகளின்போது அவர்கள் முன்மொழிந்த ‘ஸ்கேட் பார்க்’ வசதியும் இத்திட்டத்தில் இடம்பெறும்,” என்றார்.
“இத்திட்டம் நிறைவடைந்ததும், தெற்கு செபராங் பிறை பகுதியில் அமையும் முதல் ஸ்கேட் பூங்காக்களில் ஒன்றாக இது திகழும்,” என்றார்.
இத்திட்டத்தின் ஒப்பந்த மதிப்பு ரிம467,896 எனத் தெரிவிக்கப்பட்டது. கடந்த 2026 ஆகஸ்ட் 5ஆம் தேதி கட்டுமானத் தளம் ஒப்படைக்கப்பட்டதைத் தொடர்ந்து பணிகள் தொடங்கின. மொத்தம் 24 வாரங்களில் பணிகளை நிறைவு செய்யத் திட்டமிடப்பட்டுள்ள நிலையில், 2027 ஜனவரி 19ஆம் தேதி பணிகள் நிறைவடையும் என நிர்ணயிக்கப்பட்டுள்ளது.
வீட்டுவசதி மற்றும் ஊராட்சித் துறை அமைச்சகத்தின் (KPKT) நிதியுதவியுடன் ‘தாமான் மடானி’ திட்டத்தின் கீழ் இத்திட்டம் செயல்படுத்தப்படுவதாக ஜேசன் தெரிவித்தார். இத்திட்டத்தின் கீழ் ஒவ்வொரு ‘தாமான் மடானி’ பகுதிக்கும் ரிம500,000 நிதி ஒதுக்கப்படுகிறது.
மூன்று ‘தாமான் மடானி’ பகுதிகள் எம்.பி.எஸ்.பி. நிர்வாகத்தின் கீழும், மேலும் மூன்று பகுதிகள் பினாங்கு தீவு மாநகர் கழகம் (எம்.பி.பி.பி) நிர்வாகத்தின் கீழும் வருகின்றன. இதன் மூலம், மாநிலத்தில் இத்திட்டத்தின் கீழ் இடம்பெறும் பகுதிகளின் மொத்த எண்ணிக்கை ஆறாக உயர்ந்துள்ளது.
“செபராங் ஜெயாவில் உள்ள தாமான் பாவ் ஜெயா மற்றும் தாமான் கெலிசா ஈமாஸ் ஆகியவையும் இதில் அடங்கும். பல்வேறு இடங்களில் மேம்பாட்டுப் பணிகள் ஒரே நேரத்தில், கட்டம் கட்டமாக மேற்கொள்ளப்பட்டு வருகின்றன,” என்று ஜாவி சட்டமன்ற உறுப்பினருமான ஜேசன் தெரிவித்தார்.
இதற்கிடையில், இத்திட்டத்தின் முக்கியப் பணிகளில் ஸ்கேட் பூங்கா, பாதசாரிகளுக்கான நடைபாதைகள் மற்றும் பராமரிப்புப் பாதைகள் அமைத்தல், ஆரம்பநிலைப் பணிகள், புல்தரை அமைத்தல் மற்றும் நிலத்தைச் சீரமைத்தல் ஆகியவை அடங்கும் என்று சித்தி பாத்திமா தெரிவித்தார்.
“மேலும், உலகளாவிய வடிவமைப்புக் கோட்பாடுகளுக்கு ஏற்ப நுழைவாயில், இருக்கைகள், தடுப்புக் கம்பங்கள் மற்றும் மோட்டார் சைக்கிள் தடுப்புகள் ஆகியவை அமைக்கப்படுகின்றன.
“அத்துடன், சுழலும் வாயில் ஒன்றை நிறுவுதல் மற்றும் இரண்டு விளையாட்டு மைதானங்களை அமைத்தல் ஆகிய பணிகளும் மேற்கொள்ளப்படுகின்றன. புதிய வசதிகளை அமைப்பதற்கு இப்பகுதி ஏற்றதாக இருப்பதை உறுதி செய்யும் வகையில், ஏற்கெனவே உள்ள கட்டமைப்புகளை இடித்து அகற்றுதல் மற்றும் நிலத்தைச் சீரமைத்தல் உள்ளிட்ட பணிகளும் தற்போது நடைபெற்று வருகின்றன,” என்று அவர் விளக்கினார்.