மலேசிய இந்து சங்கம் பினாங்கு மாநில அரசாங்கத்துடன் இணைந்து பல திட்டங்களை மேற்கொள்ள இணக்கம்

மலேசிய பினாங்கு இந்து சங்கம் பினாங்கு மாநில முதல்வர் மேதகு சாவ் கொன் யாவ் அலுவலகத்திற்கு மரியாதை நிமித்தம் வருகை மேற்கொண்டனர்.

மலேசிய பினாங்கு இந்து சங்கம் தலைவர் முனியாண்டி, துணை தலைவர் ‘தொண்டர்மணி’ முனிசரன் & தர்மன், செயலாளர் மோகன், பொருளாளர் கலாராணி, துணை பொருளாளர் நவரசன், மகளிர் அணி தலைவி ‘தொண்டர்மணி’ சரோஜா, இளைஞர் அணி தலைவர் சிவகுரு மற்றும் உறுப்பினர் அப்பன் ஆகியோர் கொம்தாரில் இருக்கும் முதல்வர் அலுவலகத்திற்கு வருகை மேற்கொண்டனர்.

முப்பது நிமிடங்களுக்கு நடைபெற்ற இச்சந்திப்பு கூட்டத்தில் மலேசிய பினாங்கு இந்து சங்கத்தின் எதிர்கால திட்டங்களையும் நிகழ்வுகளையும் முன் வைத்தனர். கோயில் மாநாடு, மத மாநாடு மற்றும் இடுகாடு வாங்குவதும் இவர்களின் எதிர்கால திட்டங்களில் அடங்கும்.

பினாங்கு பொது மருத்துவமனையிலிருந்து பெற்றுக்கொள்ளாத சடலங்களுக்கு சடங்குகளை செய்து உதவுவதன் நோக்கமாக இடுகாடு வாங்க இணக்கம் கொண்டுள்ளதை மாநில முதல்வரிடன் எடுத்துரைத்தனர். மேலும், வசதி குறைந்த குடும்பங்களுக்கு ஈமச்சடங்குகளை மேற்கொள்ள குறைந்த கட்டணம் வழங்கவும் இத்திட்டம் வரையறுக்கப்பட்டுள்ளதாக குறிப்பிட்டனர்.

இதனிடையே, மலேசிய பினாங்கு இந்து சங்கம் பினாங்கு மாநில அரசின் ஒத்துழைப்பையும் உதவியையும் நாடுவதாக அச்சந்திப்பு கூட்டத்தின் போது குறிப்பிட்டிருந்தனர். அதற்கு மாநில முதல்வர் மேதகு சாவ் கொன் யாவ் மலேசிய பினாங்கு இந்து சங்கத்தின் விண்ணப்பம் பரிசீலிக்கப்படும் என குறிப்பிட்டார்.

மேலும், பினாங்கு மாநில அரசுடன் இணைந்து பினாங்கு 2030 இலக்கை அடைய மலேசிய பினாங்கு இந்து சங்கம் வற்றாத ஆதரவையும் ஒத்துழைப்பையும் வழங்கும் என நம்பிக்கை தெரிவித்தார் அதன் துணை தலைவர் தர்மன். மலேசிய பினாங்கு இந்து சங்கத்தினர் மாநில முதல்வருக்கு பொன்னாடை போற்றி மாலை அணிவித்து மரியாதை செய்தனர் என்பது பாராட்டக்குரியதாகும்.