ஜார்ச்டவுன் – ஸ்ரீ முருகன் நிலையம் (SMC) வடக்கு மண்டலம் ஏற்பாடு செய்த ஒற்றுமை வேல் ஆராதனை 2026 நிகழ்ச்சி, பினாங்கு அருள்மிகு பாலதண்டாயுதபாணி ஆலயத்தில்ஆன்மிக எழுச்சியுடன் சிறப்பாக நடைபெற்றது.
அருள்மிகு பாலதண்டாயுதபாணி தேவஸ்தானம் மற்றும் மலேசிய இந்து சங்கம் பினாங்கு மாநிலப் பேரவையின் அதிகாரப்பூர்வ ஒத்துழைப்புடன் நடைபெற்ற இந்நிகழ்ச்சியில், பினாங்கு, கெடா, பேராக் மற்றும் பெர்லிஸ் மாநிலங்களைச் சேர்ந்த 350-க்கும் மேற்பட்ட பக்தர்கள் கலந்து கொண்டு, வரவிருக்கும் 32ஆவது கல்வி யாத்திரை வெற்றிகரமாகவும் பாதுகாப்பாகவும் நடைபெற இறைவனைப் பிரார்த்தித்தனர்.
மாலை 6.00 மணிக்கு தொடங்கிய நிகழ்ச்சியில் குத்துவிளக்கு ஏற்றுதல், வேத மந்திர பாராயணம் மற்றும் முருகப்பெருமானுக்கு சிறப்பு வேல் ஆராதனை நடைபெற்றது. இப்பூஜைகளை ஆலயத்தின் மூத்த அர்ச்சகர்கள் வழிநடத்தினர்.
யாத்திரையில் பங்கேற்கும் அனைவரின் பாதுகாப்பு, கல்வி சார்ந்த பயனுள்ள பயணம், சமூக நலன் மற்றும் தலைமுறைகள் தழுவிய இந்து சமயப் பண்பாடுகளைப் பேணிப் பாதுகாக்கும் நோக்கில் ஒற்றுமை என்ற கருப்பொருளை மையமாகக் கொண்டு சிறப்பு பிரார்த்தனைகள் நடைபெற்றன.
ஸ்ரீ முருகன் நிலையம் வடக்கு மண்டல இணை இயக்குநர் டாக்டர் ஜே. சுமதி கூறுகையில், ஒற்றுமை வேல் ஆராதனை, 32ஆவது கல்வி யாத்திரைக்கான ஆன்மிக அடித்தளத்தை வலுப்படுத்தியுள்ளது.
“கடந்த 30 ஆண்டுகளுக்கும் மேலாக கல்வி, சேவை மற்றும் ஆன்மிக வளர்ச்சியை முன்னிறுத்தி நடைபெறும் கல்வி யாத்திரையின் வெற்றிக்கு நமது ஒற்றுமையே மிகப்பெரிய பலமாகும்,” என்றார்.
நூற்றாண்டுக்கும் மேலாக இந்து சமுதாயத்தின் ஆன்மிக மையமாகத் திகழும் எங்கள் ஆலயத்தில் இந்நிகழ்வை நடத்துவதில் பெருமை கொள்கிறோம், என அருள்மிகு பாலதண்டாயுதபாணி தேவஸ்தான ஆலயத் தலைவர் கே. குமாரதிரவியம் கூறினார்.
பக்தர்களின் பக்தியும் பிரார்த்தனையும் 32ஆவது கல்வி யாத்திரையின் ஒவ்வொரு அடியையும் இறையருள் வழிநடத்தும் என நம்பிக்கை தெரிவித்தார்.
மலேசிய இந்து சங்கம் பினாங்கு மாநிலப் பேரவைத் தலைவர் விவேக ரத்னா தர்மன் கூறுகையில், சமய அமைப்புகளும் சமூகமும் ஒன்றிணைந்து செயல்படுவது ஆன்மிக ஒற்றுமையை வலுப்படுத்துவதோடு, இளைஞர்களின் கல்வி, ஒழுக்கம் மற்றும் நற்பண்பு வளர்ச்சிக்கும் உறுதுணையாக அமையும், என்றார்.
இந்நிகழ்ச்சியில் செனட்டர் டாக்டர் லிங்கேஸ்வரன் மற்றும் பினாங்கு ம.இ.கா கிளைத் தலைவர் தினகரன் ஆகியோர் சிறப்பு விருந்தினராக கலந்து கொண்டனர்.